2005 – VII – 7
Gora San Fermin!
Komunikazioa 026

Aupa lagunok:
Euskal Herriko kapitalean txupinazoa jaurti baino lehen zenbait berri azaldu behar ditut:

1. ARGAZKIAK: Uztailaren 15etik aurrera aukera izango da DJ LAIA eta KONTRAKANTXA bezala buruturiko emanaldien 100 argazki osaturiko erreportaia ikusteko “Argazkiak – Photo” atalean. Bertan Intxaurrondo, Amsterdam, Paris, Arantza, Madrid, Berlin, Madrid, Barcelona, New York, Amman eta Damaskoko irudiak ikusi ahal izango dira.
Hemendik New Yorkeko Mehanata Cultural Club eta Local Project, baita Ammaneko Makan Center eta Cheb Balowski taldeko lagunak agurtu nahi ditut benetan eskertuta izandako adiskidetasuna, laguntza eta babesarengatik. Damaskoren gainean AEBtako mehatxua estutuko balitz, haruntza joango ginateke krimen horren kontra egitera ahalko genukeen neurrian. Nire herriko jaietara itzulita, tristea da esatea baina aitortu beharrean nago fundamentalista gehiago topatu ditudala Irunen, Ekialde Ertainean baino. Nire besarkadarik beroena herriko jai nagusian irain eta golpeen gainetik libreki parte hartzen duten emakume eta gizonezkoentzat. Geroa geurea da.

2. KONTRAKALEA ACCIÓ DVD: Eta eskubide zibil eta politikoen defentsan jarraitu behar dut, Jarrai-Haika-Segi makro-sumarioak (non nik ere deklaratu behar izan nuen Gazte topaguneak antolatzearen karira) eragindako gastuei aurre egiteko, Bartzelonan buruturiko “KONTRAKALEA ACCIÓ” emanaldiaren DVD bat salgai jarriko dugulako gaurtik aurrera 9 euroen truke. Kontzertua amaitu bezain laster salgai jarri zen ekintzaren erresumena, MAK, AFRIKA, SORKUN, KONTRAKANTXA eta BAD SOUND SYSTEM taldeen kantuekin, orain ikusi eta entzun ahal izango da, baita Irundik Bartzelonara bidaian izandako entsaio bitxiaren zati batzu. DVDa Euskal Herriko Jai guztietan ipintzen diren txosnetan eskuratu ahal izango da.



3. NEGU GORRIAK: Aurtengo negurako Negu Gorriak taldearen DVD bat kaleratzeko egitasmoa ari gara lantzen. Bertan NG taldeak VHS formatoetan kaleraturiko edukiak biltzea litzateke asmoa, baita 2001.eko otsailaren 23an Donostiako Belodromoan “Geurea da Garaipena” izenburupean buruturiko kontzertuaren atal indeditoa ere. Honekin batera aipaturiko kontzertuaren zuzeneko CD extra bat argitaratuko genuke DVDarekin batera, nire DVDarekin bitxikerien CD bat kaleratu genuen bezala.
Honen harira, oraingoan ere eskaera bat luzatu behar dizuet: Edozein materiala grabaturik baldin baduzue, batez ere NG taldeak burutu zituen azken 3 kontzertuen inguruan (Baiona eta Belodromoko biak), mesedez igorri METAK disketxearen helbidera; Eguzkitza 13, 20.304 IRUN, NEGU GORRIAK jarriz. Seguru detailerik txikiena ere, baliogarria izango zaigula.

Besarkada handi bat eta laster arte lagunok:

Fermin Muguruza