Azken ordua: Barajas
Behean aurki dezakezuen urteko azken komunikazioa, ostiral gauean idatzi nuen, 29an. Atzo goizean ordea, larunbata 30, Barajasen izandako eztandaren ostean, ezin nuen gaur zintzilikatu, gertatukoari erreferentzia egin gabe.
Izan ere, hitzari eskainitako gune xume honetatik, nire erabateko gaitzespena azaldu nahi baitut, Madrilen izandako atentatuari. Nire amorrua bi langile ekuadortar desagertuengatik. Bidaiariok beti aurkitu ahal izaten dugu lekutxoren bat atsedena hartzeko eta horregatik ni ere oihukatzen ari naiz hondakinetatik, atzo goizean nire isileko presentziarekin, Segiren aldeko prentsaurrekoan oihukatu nuen bezala, beraien jarduera politikoa gazte erakunde bezala zilegiztatzen eta pairatzen duten jazarpena salatzen.
Gaur, inoiz baino gehiago eta beti bezala nire izenean bakarrik, ozenki eskatzen diot ETAri sueten iraunkorra berrezartzea eta Espainiar zein Frantziar gobernuei, errepresioa etetea, ideiak ilegaltzat jotzen dituzten legeak bertan behera uztea eta presondegiko politika sarraskitzailea aldatzea, errespetuaren zimendu sendoetan, hitzari emandako aukera eta bake prozesua berbideratzeko. Nire aldetik, prozesua blindatzeko, atzeraezina bihurtuz, antolatzen diren hiritarren ekimenetan parte hartzeko konprometitzen naiz, soilik gizarte zibila eta herri mugimenduak lortuko duelako geure erabakiak eta eskubideak errespeta daitezen.

Besarkada erraldoi bat: Fermin Muguruza

06 / 12 / 31
Komunikazioa 036

Aupa lagunok:
2006. urtea agurtzeko asmoz, hona hemen nire agurra.
Aurtengo komunikatuak irakurri ditut jabetzeko urte honen garrantziaz eta benetan estimatzen dudala bizi izandakoa zuekin konpartitu izana.
Udazkeneko argazkiak zintzilik dira jada bere atalean. BECekoekin batera Uruguay eta Argentinakoak. Eskerrik asko argazkiak bidali dizkidatenei, baita horietan agertzen direnei ere.
TALKA dendan eskuragai dago “Bass-que Culture” DVD+CD Remix ekoizpena, eta aukera duzue kubismo soniko berriaren sortzaileen dekonstrukzioak entzuteko.
Miresmen eta esker oneko besarkada handi bat igorri nahi diot Eduardo Galeanori, bere adiskidetasun solasa eta italiar jatetxeko gonbidapenarengatik Montevideon.
Agurtu nahi dut Oleguer, Bartzelonako jokalariari, bere konpromisoa, begikotasuna, arreta eta liburuarengatik, Ronaldinho eta bere inspirazioa “Euskal Herria Jamaika Clash” entzundakoan, kriston gola sartuz, ohartu zidan bezala, baita Xavi Cellules (katalanerako arduraduna Kortaturen garaitik, gaur egun arte webean) eta Eukeneri ere, beti hor egoteagatik.
Hurrengo urtean ere lehenengo lerroan elkar ikusiko dugulakoan, beheko argazki atseginarekin agurtzen zaituztet.
The show must go on. Aurrera bolie!
Fermin Muguruza


Xavi Cellules, Oleguer, Unai, Ronaldinho, FM eta Irune (Argazkia: Jone Unanua)